Kaupa rekstur Lifandi markaðar í Borgartúni

Skiptastjóri þrotabús Lifandi markaðar hefur selt veitingastaði og verslanir fyrirtækisins til nokkurra mismunandi aðila. Hjónin Þórdís Björk Sigurbjörnsdóttir og Ellert Aðalsteinsson keyptu rekstur veitingastaðarins í Borgartúni.

Þórdís og Ellert eru bæði fjárfestar, auk þess sem Ellert er margfaldur Íslandsmeistari í leirdúfuskotfimi. Þau kaupa vörumerkið og reksturinn í Borgartúni af skiptastjóra í gegnum einkahlutafélagið EE Development.

Í tilkynningu frá EE Development segir Þórdís að stefnt sé á að opna Lifandi markað í Borgartúni strax á mánudag. Þar segir jafnframt að eindreginn vilji sé til þess að endurráða starfsfólk Lifandi markaðar, en öllum sjötíu starfsmönnum fyrirtækisins var sagt upp í gær.