Ráðuneytið ætlar ekki að grípa inn í

Bæjarráð Hafnarfjarðar lýsir yfir vonbrigðum með að sjávarútvegs- og landbúnaðarráðherra ætli ekki að koma að máli Hafnarfjarðarkaupstaðar og Stálskipa varðandi ráðstöfun aflaheimilda úr sveitarfélaginu.

Afstaða ráðuneytisins kom fram í bréfi sem sent var til Hafnarfjarðar en þar segir að framsal aflaheimilda af Þór HF-4 úr Hafnarfirði uppfylli ekki lagaskilyrði fyrir inngripi, né hafi veruleg neikvæð áhrif í atvinnu- og byggðalegu tilliti.

Þó er tekið fram að Stálskip hafi brugðist lagalegri skyldu um að tilkynna söluna á aflaheimildunum.

Bæjarráð Hafnarfjarðar hefur ákveðið að stefna eigendum Stálskipa og þeim sem keyptu skipið og aflaheimildirnar. Þrátt fyrir afstöðu ráðuneytisins var lögmanni sveitarfélagsins falið að vinna áfram að málinu.