FIA íhugar breyttar refsingar

Alþjóða aksturstíþróttasambandið (FIA) leitar nú nýrra leiða til að refsa liðum fyrir óörugg þjónustuhlé. Núgildandi reglur refsa ökumönnum fyrir slík þjónustuhlé.

Ökumenn hafa herjað á Charlie Whiting, regluvörð FIA og óskað eftir breytingum á reglum um óörugg þjónustuhlé.

Eins og staðan er núna fá ökumenn, sem fara af stað úr þjónustuhléum á óöruggan máta, til dæmis í veg fyrir annan bíl eða með þrjú dekk föst undir bílnum, fimm sekúndna refsingu. Einnig er ökumaður sem gerir slíkt færður aftur um tíu sæti á ráslínu fyrir næstu keppni. Þetta þykir ökumönnum í Formúlu 1 of mikið, fyrir eitthvað sem er ekki á valdi ökumannanna.

„Mér þykir þetta of strangt,“ sagði Sauber ökumaðurinn Esteban Gutierrez. „Þú hefur þegar tapað tíma á fimm sekúndna refsingunni og svo ertu settur tíu sætum aftar í næstu keppni. Þetta er alltof mikið,“ bætti Sauber maðurinn við.

Gutierrez hlaut refsingu af þessu tagi í breska kappakstrinum þegar hann ók af stað með eitt laust dekk undir bílnum.

Málið kom upp á fundi ökumanna fyrir skemmstu og þá lofaði FIA að skoða aðrar leiðir til að refsa liðum. Hugsanlega munu ökumenn því sleppa við refsingar vegna þessa í framtíðinni. Liðin gætu fengið háar sektir eða hugsanlega tapað stigum.

Ef liðin samþykkja einróma að breyta refsiákvæðunum fer tillagan til umfjöllunar hjá Alþjóða akstursíþrótta ráðinu. Ef ráðið samþykkir hana gæti hún tekið gildi fyrir belgíska kappaksturinn sem fer fram 24. ágúst.