Segir vinnubrögð Seðlabankans í tryggingamálinu forkastanleg

Framkvæmdastjóri Samtaka verslunar og þjónustu segir að stjórnendur Seðlabankans viti ekki sjálfir hvaða samningar um lífeyristryggingar falla undir gjaldeyrishöftin og hverjir ekki. Brýnt sé að eyða þessari óvissu sem fyrst. Hann segir vinnubrögð Seðlabankans í málinu forkastanleg. 

Samkvæmt lögum um gjaldeyrismál sem tóku gildi hinn 28. nóvember 2008 takmarka gjaldeyrishöftin ekki vöru- og þjónustuviðskipti. Iðgjaldagreiðslur samkvæmt samningum um vátryggingar, t.d. líf- sjúkdóma- eða slysatryggingar, teljast kaup á þjónustu og eru því heimilar samkvæmt lögunum. Seðlabankinn hefur undanfarin ár flokkað samninga um lífeyristryggingar hjá erlendum tryggingarfélögum undir vöru- og þjónustuviðskiptin og hafa þeir því ekki fallið undir höftin.

Samningarnir eru blanda af tryggingum og lífeyrissparnaði. Sú ákvörðun Seðlabankans að fella þessa samninga undir höftin með nýjum reglum sem tóku gildi 19. júní hefur vakið hörð viðbrögð. Breytingin nær til allra samninga sem gerðir voru eftir 28. nóvember 2008 þegar höftin voru lögfest en samningar um lífeyristryggingar sem gerðir voru fyrir þann tíma halda gildi sínu.

Félög eins og Allianz og Íslandi, Tryggingamiðlun Íslands og Sparnaður hafa gagnrýnt Seðlabankann fyrir að hafa ekki haft samráð við þau í aðdraganda þessarar ákvörðunar.

Segir að Seðlabankinn verði að eyða óvissu

Samtök verslunar og þjónustu hafa gætt hagsmuna vátryggingarmiðlara í málinu. Andrés Magnússon framkvæmdastjóri samtakanna segir að stjórnendur Seðlabankans viti ekki sjálfir hvaða samningar um lífeyristryggingar falli undir gjaldeyrishöftin og hverjir ekki.

„Það kom berlega fram á fundinum sem við héldum með þeim á fimmtudaginn að svo er ekki. Þeir gera sér engan veginn grein fyrir því og gátu ekki svarað grundvallarspurningum sem lúta að þessu álitaefni,“ segir Andrés.

Andrés segir það afar gagnrýnivert að Seðlabankinn hafi ákveðið að setja hinar nýju reglur án þess að hafa þetta á hreinu en um þrjátíu þúsund einstaklingar eru með samninga um lífeyristryggingar sem voru gerðir eftir lögfestingu hafta.

„Þetta er eiginlega forkastanlegt vegna þeirra hagsmuna sem þarna eru undir. Þetta er enginn smá fjöldi Íslendinga sem á hagsmuna að gæta. Það er alvarlegt að bankinn geti ekki, þegar þetta er að gerast, svarað hagsmunaaðilum með grundvallarspurningar um hvaða áhrif þetta hefur á allan almenning í landinu,“ segir Andrés. Þá segir hann hættu á að stoðum verði kippt undan rekstri vátryggingarmiðlara og annarra fyrirtækja á þessum markaði með þessum reglum. 

Már Guðmundsson seðlabankastjóri sagði í samtali við fréttastofu í gær að málefni umboðsfyrirtækja erlendra tryggingafélaga hefðu verið til skoðunar hjá Seðlabankanum í nokkur ár og fyrirtækjunum hafi verið fullkunnugt um það. Að sögn Más mun Seðlabankinn senda frá sér yfirlýsingu eftir helgina þar sem brugðist verður við þeirri gagnrýni sem sett hefur verið fram á vinnubrögð bankans í málinu.