105 sm lax úr Húseyjakvísl

Það  stefnir í að þetta sumar verði kallað stórlaxasumarið því hlutfall 2 ára laxa í ánum er afburðagott og nú þegar eru nokkrir 20 punda og stærri komnir á land.

Norðurá, Miðfjarðará, Vatnsdalsá, Laxá í Aðaldal og nú síðast Húseyjakvísl hafa allar gefið laxa um og yfir 20 pund.  Síðan þegar veiðibækur eru skoðaðar t.d. í Vatnsdalsá og Miðfjarðará eru ekki nema 2-3 svo kallaðir eins ár laxar komnir í bókina.  Allt hitt eru laxar 75 sm og stærri og mest af þeim milli 80 og 85 sm.  Þetta er það sem menn sækjast eftir og þessar ár eiga það allar sameiginlegt fyrir utan Norðurá að lítill sem engin kvóti er í ánum og öllum laxi þess vegna sleppt aftur.  Þrátt fyrir að magnið af laxi aukist ekkert endilega með Veitt/sleppt er það nokkuð ljóst að stærðin á löxunum virðist hið minnsta hafa farið vaxandi og það er það sem erlendir veiðimenn sækjast eftir, í það minnsta flestir þeirra.  Stórlax sem er veiddur og sleppt er verðmætari en sami lax í plasti á bakkanum og það er þetta sem knýr leigutaka til að innleiða V/S í ánum.  Víst er að veiðimenn eru ekki allir sammála um ágæti þessa en þeir sem vilja veiða sem mest og fara heim með þann afla hafa ennþá úr mörgum ám að velja svo það er greinilega nóg framboð fyrir alla.