CNOOC vill flýta borun í Drekann

Fulltrúar kínverska olíufélagsins CNOOC kynntu samstarfsaðilum sínum í dag verkáætlun sem miðar við að boranir hefjist á Drekasvæðinu mun fyrr en áður var gert ráð fyrir. Þess verður freistað að hefja hljóðbylgjumælingar þegar í sumar og að fyrsti borpallurinn gæti jafnvel verið kominn eftir fjögur ár.

Kínverska ríkisolíufélagið varð aðili að olíuleitinni í janúar og þá var því spáð að innkoma þess markaði þáttaskil. Með CNOOC í þriðja sérleyfinu eru norska félagið Petoro og íslenska félagið Eykon en fulltrúar þeirra funduðu í Reykjavík í dag um næstu skref. Gunnlaugur Jónsson, forstjóri Eykons, segir að á fundinum með CNOOC-mönnum í dag hafi verið byrjað á því að fara yfir umhverfis- og öryggismál. Þeir hafi sett þau mál efst á dagskrá.

Stóru tíðindin eru hins vegar þau að CNOOC-menn vilja hefjast handa sem fyrst.

„Áhuginn er mjög mikill og við finnum það að þeir fara af stað af miklum krafti og ætla að gera þetta töluvert hraðar en við höfðum hugsað okkur,” segir Gunnlaugur. Hann segist þó ekki vilja gefa of miklar væntingar en þeir séu að tala um að minnsta kosti nokkrum árum fyrr en áætlanir höfðu verið um.

Forsenda borana eru nákvæmar hljóðbylgjumælingar og þótt komið sé fram á sumar, og erfitt að fá rannsóknarskip, á samt að reyna.

„Það er möguleiki á því að það verði tvívíðar endurvarpsmælingar í ár,” segir Gunnlaugur.

Kinverska félagið er það sterkt að það eitt og sér hefur burði til að ráðast í dýrar olíuboranir og nú hafa ráðmenn þess kynnt áætlun um að byrja fyrr. Gunnlaugur segir að samkvæmt rannsóknaráætlun sé gert ráð fyrir að ákveðið verði eftir 8 ár hvort borað verði eða leyfinu verði skilað. 

„Þannig að þetta er nokkrum árum fyrir það, eins og það lítur út núna. En auðvitað getur þetta breyst” 

-Þannig að menn gætu jafnvel stefnt á boranir eftir 4-5 ár? 

“Já.”