Fyrsti laxinn kominn úr Eystri Rangá

Fyrsti laxinn úr Eystri Rangá kom á land í gær en markvisst hefur verið unnið í því að veiða snemmgengna laxa til að nota þá í klak.

Þetta hefur skilað því að laxinn gengur fyrr í ánna og þegar áin opnar í júlí er yfirleitt lax að finna á öllum svæðum þó mesta lífið sé á neðstu svæðunum.  Fyrsti laxinn þetta árið kom á land á Hofteigsbreiðu sem er einn af bestu stöðunum í ánni en hann er á svæði 4, rétt fyrir neðan veiðihúsin.  Þetta var 4 kílóa hrygna sem tók fluguna Grýlu hjá veiðimanninum Óskari Björgvinssyni.  Eystri Rangá opnar eftir tvær vikur og er meðalþyngdin þar fyrstu tvær vikurnar yfirleitt feyknagóð en undantekning hefur verið að sjá eins árs laxa fyrstu dagana og laxarnir sem veiðimenn eru að kljást við yfirleit 75-90 sm langir og þungir eftir því.