Sparifé 30.000 Íslendinga í hættu

Árum saman hafa miðlarar erlendra tryggingarfyrirtækja eins og Allianz á Íslandi og Sparnaðar boðið upp á sparnaðar- og tryggingaleiðir þar sem iðgjaldagreiðslum er varið til söfnunar höfuðstóls í erlendum gjaldeyri. Í gær tilkynnti Seðlabankinn hins vegar að þessi starfsemi teldist brot á lögum um gjaldeyrismál en Samtök verslunar og þjónustu gæta hagsmuna vátryggingamiðlara á Íslandi.

Hátt í þrjátíu þúsund Íslendingar eiga fjármuni hjá þessum fyrirtækjum, alls um 4,2 milljarða íslenskra króna. Því vaknar spurningin, hvað verður um þessa fjármuni?

„Ég myndi halda því alveg klárt fram að framtíð þessara samninga væru í óvissu,“ segir Andrés Magnússon, framkvæmdastjóri Samtaka verslunar og þjónustu. „Það eru gríðarlegir hagsmunir þarna í húfi fyrir þúsundir Íslendinga. Mér finnst Seðlabankinn hafa komið ansi bratt að þessu máli, hann er að tefla í tvísýnu gífurlegum hagsmunum. Viðbótarlífeyrissparnaði hjá þúsundum Íslendinga. Það er ábyrgðarhluti hjá bankanum að koma fram með þessum hætti að okkar mati og hlýtur að kalla á hörð viðbrögð allra hagsmunaaðila.“

Andrés mun á morgun funda með fulltrúum Fjármálaeftirlitsins og Seðlabankans um málið. Samtök verslunar og þjónustu hafa þegar kvartað til umboðsmanns Alþingis vegna framgöngu Seðlabankans í málinu og gagnrýna skort á samráði

„Það er algjör firra hvað okkur varðar að það hafi verið haft samráð við hagsmunaaðila í aðdraganda þessa máls. Og það hefur komið fram hjá öðrum aðilum í öðrum viðtölum. Menn lesa þetta á þjóðhátíðardeginum í fjölmiðlum, algjörlega án þess að nokkur aðdragandi hafi verið að málinu að hálfu bankans um þetta mál.“