Stórir áfangar í afnámi gjaldeyrishafta á þessu ári

Viðskiptaráð Íslands birti í gær skýrslu um afnám gjaldeyrishafta undir yfirskriftinni: „Höggva þarf á hnútinn: Uppgjör þrotabúa föllnu bankanna."

Í skýrslunni segir að ekki sé fyrirséð að nokkuð muni þokast varðandi nauðasamninga á næstu misserum - það sé einfaldlega of langt milli aðila til að raunhæft sé að binda vonir við slíkt. Þá segir:

„Þrátt fyrir þessa pattstöðu telur Viðskiptaráð að lausn sé til staðar sem er til hagsbóta fyrir bæði þjóðarbúið og kröfuhafa. Slík lausn fæli í sér að slitastjórnir fengju samþykkta beiðni um undanþágu vegna nauðasamnings sem uppfyllir ekki skilyrði stjórnvalda að fullu leyti. Á móti myndu kröfuhafar gefa eftir hluta af þeim kröfum sem slitastjórnirnar gera í dag.“

„Við áætlum sem svo að tímavirði fjármagns, og annar kostnaður, sem er annars vegar bankaskatturinn og hins vegar rekstrarkostnaður þrotabúanna, nemi um það bil 260 milljörðum íslenskra króna á ári. Þannig að tíminn er svo sannarlega peningar fyrir kröfuhafanna”, segir Frosti Ólafsson, framkvæmdastjóri Viðskiptaráðs Íslands.

Bjarni Benediktsson fjármálaráðherra segir stjórnvöld hafa nýtt tímann vel undanfarið ár við að kortleggja vandann við afnám gjaldeyrishafta.

„Við erum núna að stíga þau skref að ráða til okkar erlenda ráðgjafa og undirbúa seinni fasann í þessu. Áherslan hefur fram til þessa verið meira á framkvæmd haftanna en nú ætlum við að fara að leggja alla áherslu á afnámsferlið. Við munum síðar í þessum mánuði ráða sérstaka ráðgjafa okkur til halds og trausts við ýmis mál sem skipta máli í hinu stóra samhengi hlutanna. Í framhaldinu munum við kynna okkar áform fyrir samstarfsaðilum okkar erlendis,” segir Bjarni.

Telur þú líklegt að það dragi til tíðinda í þessu máli á þessu ári?

„Það er ekki alfarið í höndum stjórnvalda að ráða úrslitum um það. En ég er með væntingar um að það verði stórir áfangar stignir á þessu ári já”, segir Bjarni Benediktsson.