Icelandair aflýsir flugi til Rússlands - 1500 manns áttu bókað flug

Ekkert verður af áætlunarflugi flugfélagsins Icelandair til St. Pétursborgar í Rússlandi í júní í sumar. Flugið átti að vera tvisvar í viku og hefjast í byrjum mánaðarins. Allt upp undir 1500 manns höfðu bókað flug að sögn Guðjóns Arngrímssonar, upplýsingafulltrúa Icelandair.

„Við þurfum við að endurskoða ýmsa þætti í starfseminni í ljósi þeirrar óvissu sem verkfallsaðgerðir gegn Icelandair skapa um þessar mundir. Þar á meðal að reyna með fyrirvara að létta á áætlun sumarsins og minnka þörf á yfirvinnu,“ segir Birkir Hólm Guðnason, framkvæmdastjóri Icelandair.

Flugið átti að vera tvisvar í viku. Gert er ráð fyrir að flogið verði ti log frá borginni í júlí og ágúst samkvæmt áætlun. Öllum farþegum sem voru bókaðir í flug til St. Pétursborgar í júní verður boðið upp á endurbókanir eftir öðrum leiðum.