Segist ætla að selja stúlkurnar

Leiðtogi nígerísku öfgasamtakanna Boko Haram hefur sent frá sér myndskeið þar sem hann segist ætla að selja rúmlega 200 skólastúlkur sem saknað hefur verið í um þrjár vikur.

Samtökin segjast bera ábyrgð á hvarfinu og hefur fréttastofa AFP myndbandið undir höndum. 276 stúlkum var rænt aðfaranótt 14. apríl í norðurhluta landsins en 53 þeirra tókst að sleppa skömmu eftir ránið.

„Guð sagði mér að selja þær,“ segir Abubakar Shekau, leiðtogi samtakanna, í myndbandinu. „Þær eru hans eign og ég mun hlýða fyrirmælum hans.“

Ekki er tekið fram í myndbandinu hversu margar stúlkur er átt við eða hvar þær eru niðurkomnar. Þá hefur sá orðrómur verið á kreiki að einhverjar stúlknanna hafi þegar verið seldar í hjónabönd til Kamerún og Tsjad.