Sjö vænir birtingar komnir á land í Eldvatni í Meðallandi

Nú fara fréttir af veiðiskap að detta inn frá sjóbirtingssvæðunum sem opnuðu í gær og fréttir af flestum svæðum eru góðar.

Sem dæmi um góða opnun þá veiddust 7 vænir birtingar í Eldvatni og fleiri vænir sluppu á fyrstu þremur vöktunum, þar af einn sem menn skjóta á að hafi verið um 90 sm langur en sjóbirtingur í þeim lengdarflokki getur verið nálægt 20 pundum.  Nokkuð líf er í ánni og það má því reikna með því að veiðin verði áfram fín.  Í Vatnamótunum eru hátt í 40 fiskar komnir á land og í Litluá í Keldum eru líklega um 70 komnir á land.  Geirlandsá gaf um 40 fiska í gær og þar voru stórir birtingar í aflanum en toppurinn á öllum veiðitölum er ennþá fyrsti dagurinn í Tungulæk þar sem 91 fiskur var færður til bókar sem er frábær veiði á alla mælikvarða.  Vatnaveiðin er heldur róleg en fyrir utan fréttir af dræmri veiði í Vífilstaðavatni þá var sömu sögu að segja frá veiðimönnum sem voru í Meðalfellsvatni.

Við eigum von á fréttum frá fleiri vígstöðvum og hvertjum ykkur til að senda okkur fréttir af þinni veiði og myndir með.  Við drögum úr innsendum veiðifréttum í hverjum mánuði og í Apríl drögum við út fjögur Veiðikort.  Til að taka þátt þarftu bara að senda mynd og fréttir af þinni veiði á kalli@365.is.