Stór hluti til þrotabúa íslensku bankanna

Sanpower Group, ein stærsta fyrirtækjasamstæða í einkaeigu í Kína, hefur undirritað samning um 89 prósenta eignarhlut í bresku verslanakeðjunni House of Fraser, sem metin er á yfir 450 milljónir punda, sem samsvara ríflega 84,4 milljörðum íslenskra króna. Kaupin gengu í gegn fyrir helgi, að sögn breskra fjölmiðla.

Verið var að undirbúa skráningu House of Fraser í kauphöllina í Lundúnum síðar á árinu en áður hafði franska stórverslunin Galeries Lafayette sýnt fyrirtækinu áhuga. Stofnandi íþróttavöruverslunarinnar Sports Direct, Mike Ashley, eignaðist 11 prósenta hlut í House of Fraser og er að sögn fjölmiðla ósáttur með kaup kínverska risans á fyrirtækinu, en hann hefur síðastliðna átján mánuði reynt að eignast ráðandi hlut í fyrirtækinu.

Highland Group, félag í eigu þrotabúa gamla Landsbankans (LBI hf.) og Glitnis banka, er sagt eiga 49 prósent í House of Fraser. Nú þegar salan er gengin í gegn renna tæplega 41,4 ­milljarðar króna til Highland Group. Félagið var í eigu BG Holding, dótturfélags Baugs, en föllnu íslensku bankarnir gengu þar að veðum 2009. Fram kom í tilkynningu gamla Landsbankans í febrúarbyrjun 2009 að tekinn hafi verið yfir 34,9 prósenta eignarhlutur í HoF og hlutur Glitnis hafi því verið 14,1 prósent. Hlutur þrotabúa bankanna er því sem svarar 29,5 og 11,9 milljörðum króna.