Viðskiptavinir hvattir til að sniðganga verslun við Geysi

Landeigendafélag Geysis segir að nokkuð hafi borið á því að aðilar innan ferðaþjónustunnar hafi hvatt viðskiptavini sína til þess að sniðganga verslun við Geysissvæðið. Jafnvel hafi þeir breytt áætlunum sínum til að koma í veg fyrir viðskipti við verslunina.

„Landeigendafélagi Geysis þykir miður að ferðaþjónustuaðilar, sem eru ósáttir við gjaldtöku af ferðamönnum við Geysisvæðið, láti það bitna á óskildum aðila sem enga aðkomu hafði að ákvörðun um gjaldtökuna,“ segir í tilkynningu frá Landeigendafélaginu.

Um er að ræða verslun sem rekin er af fyrirtækinu Geysir Shops ehf. og er sjálfstætt einkahlutafélag án nokkurra tengsla við Landeigendafélag  Geysis.

„Verslunin hefur nú, vegna þrýstings þessara ferðaþjónustuaðila, hætt sölu aðgöngumiða inn á Geysissvæðið. Það er von landeigenda að ferðaþjónustufyrirtækin endurskoði nú afstöðu sína gagnvart versluninni.“

Þá segir einnig að gjaldtaka við Geysi hafi í heildina gengið vel og félagið hafi þegar samið um viðskipti við rútufyrirtæki og aðra aðila innan ferðaþjónustunnar.