Óttast að verkfall dragist á langinn

Guðríður Arnardóttir, formaður Félags framhaldsskólakennara, segist ekki vongóð um að samningar takist í kjaraviðræðum framhaldsskólakennara og ríkisins um helgina. Samninganefnd ríkisins var ekki mætt á boðaðan samningafund í morgun. Guðríður óttast að verkfall geti dregist á langinn.

Samninganefnd framhaldsskólakennara átti bókaðan fund með samninganefnd ríkisins klukkan tíu í morgun. Á tólfta tímanum fyrir hádegi var samninganefnd ríkisins ekki mætt, að sögn Guðríðar. 

„Það eru fjölmargir þættir sem við erum að fjalla um. Auðvitað snýst þetta um kaup og kjör, það gerir það. En það er líka ákveðin textavinna sem við erum að fara í gegnum og útfærsla á samningnum. Það eru enn fjölmargir þættir óafgreiddir hvað það varðar. Ég tel ólíklegt að samið verði um helgina nema verulega dragi til tíðinda þegar fulltrúar ríkisins mæta,“ á fund,“ segir Guðríður.

Hún segist óttast að verkfall í framhaldsskólum geti dregist á langinn, nema ríkið komi fram með tilboð sem endurspegli eðlilegar kjarabætur fyrir stéttina.

„Ég held að allir geri sér grein fyrir því að við viljum fá leiðréttingu á okkar launum og verða með laun til jafns við félaga okkar, sérfræðinga hjá ríkinu. Við höfum ekkert vikið frá þeirri kröfu og sitjum við samningaborðið með það markmið að ná því,“ segir Guðríður.

Uppfært: Stjórn Félags framhaldsskólakennara og Félags stjórnenda í framhaldsskólum sendi frá sér tilkynningu eftir hádegi þar sem segir að samningsaðilar hafi farið yfir stöðu viðræðna hvor í sínum hóp í morgun og síðan á sameiginlegum fundi sem hófst kl. hálftólf. „Viðræður dagsins eru beint framhald samningafundar sem stóð í allan gærdag. Viðræðunefnd kennara og stjórnenda leggur áherslu á að samningaviðræður helgarinnar skili aðilum nær samkomulagi,“ segir í tilkynningu sem þau Aðalheiður Steingrímsdóttir formaður samninganefndar FF og Ólafur H. Sigurjónsson formaður FS sendu síðdegis.