Gunnar Hólmsteinn frá CLARA til Plain Vanilla

Gunnar Hólmsteinn Guðmundsson hefur tekið við stöðu COO eða rekstrarstjóra hjá íslenska leikjaframleiðandanum Plain Vanilla.

Gunnar er 28 ára og stofnaði hugbúnaðarfyrirtækið CLARA árið 2008 sem selt var bandaríska hugbúnaðarrisanum Jive Software síðastliðið vor.

Hann hefur búið í San Francisco undanfarin þrjú ár og starfað hjá Jive Software en flytur nú aftur til Íslands til að taka við starfinu hjá Plain Vanilla. Gunnar mun starfa við hlið forstjórans, Þorsteins Baldurs Friðrikssonar, og verður meginverkefni hans að taka þátt í að leiða fyrirtækið í gegnum hinn hraða vöxt sem fylgt hefur útgáfu og vinsældum QuizUp spurningaleiksins. Gunnar hefur þegar hafið störf.

Í samtali við Vísi segist Gunnar mjög spenntur fyrir verkefnunum framundan.

„Mín aðkoma að Plain Vanilla hefur mest verið á hliðarlínunni til þessa en ég hef nú fengið tækifæri til að vinna með honum Steina (Þorsteini Baldri forstjóra) sem hefur verið draumur hjá mér og okkur báðum lengi,“ segir Gunnar.

Hann var hjá Jive Software í ár, þar sem hann sá um að innleiða CLARA inn í fyrirtækið, sem er nú orðið sjálfstæð deild innan Jive. Að sögn Gunnars hefur það gengið ótrúlega vel og salan margfaldast á þessum stutta tíma. Starfsmennirnir úti halda áfram en Gunnar verður ráðgjafi áfram í nokkra mánuði.

Hann segir QuizUp ekki aðeins flottasta sprotafyrirtækið á Íslandi.

„Jafnvel þó að það sé talað um QuizUp sem flottasta sprotafyrirtæki á Íslandi, þá er það það líka úti, ég komst varlaí vinnuna án þess að sjá fólk á víðvangi vera að spila QuizUp og komst ekki að í röðinni í FedEx af því manneskjan á undan var að klára leik,“ segir Gunnar.

Þorsteinn Baldur Friðriksson forstjóri segir Gunnar Hólmstein vera hvalreka fyrir Plain Vanilla.

„Við Gunnar kynntumst þegar hann var með byrja með CLARA og ég var líka að stofna sprotafyrirtæki. Hann hefur síðan verið búsettur í San Fransisco undanfarið og ég hef mikið átt erindi þangað. Við hittumst reglulega og ég er búinn að vera að reyna að fá hann til liðs við okkur í langan tíma.

Þorsteinn segir reynslu Gunnars af rekstri sprotafyrirtækis mikinn hag fyrir Plain Vanilla.

„Gunnar hefur reynslu af því að reka fyrirtæki sem hefur farið í gegnum þetta ferli, að breytast úr sprota í stærra fyrirtæki með Jive. Við erum gríðarlega ánægð með að fá Gunnar til liðs við okkur,“ segir Þorsteinn.