Kísilverksmiðja á Grundartanga lyftistöng fyrir Akranes

„Þetta yrði gríðarleg lyftistöng fyrir svæðið ef sólarkísilverksmiðja á Grundartanga yrði að veruleika,“ segir Regína Ásvaldsdóttir, bæjarstjóri á Akranesi. Eins og fram kom á Vísi í morgun hafa forsvarsmenn bandaríska fyrirtækisins Silicor Materials óskað eftir lóð á Grundartanga undir eina stærstu sólarkísilverksmiðju í heimi. Áætlaður kostnaður við bygginguna er um 77 milljarðar króna.

„Þetta skiptir miklu fyrir Akranes,“ segir Regína en mörg hundruð manns vinna nú þegar á Grundartangasvæðinu og margir þeirra búa á Akranesi ásamt fjölskyldum sínum.

Ef af byggingu verksmiðjunnar verður þýðir það fjölgun íbúa á svæðinu með tilheyrandi aukinni þjónustu í bænum.  

Akraneskaupstaður hefur ekki formlega aðkomu að samningagerðinni þar sem verksmiðjan verður í Hvalfjarðarsveit en Regína segir bæjaryfirvöld hafa vitað af áformunum. Hún býst við að málið verði kynnt bæjaryfirvöldum á Akranesi með formlegum hætti þegar það skýrist nánar.