Ég hélt að þingmenn Bjartrar Framtíðar væru svona eins og litlar sætar hunangsflugur. Meinlausar en þó sífellt suðandi milli betri blóma og grænni haga. En skoðanir manna eru víst mismunandi. Sumum finnst þeir vera nasistar.

Á Austurvelli í gær höfðu víst 80 manns boðað komu sína til að mótmæla skerðingu á friðhelgi einkalífs lífeyrisþega, aldraðra og öryrkja. Svona tíu til fimmtán manns mættu og fólk var mismikið hresst eins og gefur að skilja.

Páll Valur Björnsson, þingmaður BF, reyndi að tala við hópinn, kynnti sig og fékk síðan yfir sig móðursýkislegt geðvonskukast óþekktrar konu sem sakaði hann og flokk hans um nasisma. 

Varla eru svona samlíkingar vel til þess fallnar að sameina fólk í baráttu gegn neinu öðru en alvöru nasisma enda ekki allir sáttir við svona framkomu.