Fyrsta fimm stjörnu hótelið rís við Bláa lónið

Bygging á nýju fimm stjörnu hóteli við Bláa Lónið hefst í haust og er stefnt að opnun vorið 2017. Hótelið verður punkurinn yfir i-ið í 20 ára uppbyggingu baðsvæðisins. Aðsóknarmet í Bláa Lóninu féll á síðasta ári þegar tæplega 650 þúsund gestir heimsóttu lónið.

Hótelið við Bláa Lónið verður að öllum líkindum fyrsta fimm stjörnu hótelið sem rís á landinu. Hótelið verður 7.500 fm2 að stærð og mun kostnaður hlaupa á um fjórum milljörðum króna.

Nýtt hótel á eftir að reynast Bláa lóninu mikil lyftistöng. Hótelherbergin verða 63 talsins og verður mikið kapp lagt á gæði og lúxus. Auka á upplifun efnameiri erlendra gesta sem heimsækja lónið.

„Við lítum svo á að þetta sé punkturinn yfir i-ið í þeirri uppbyggingu sem við höfum staðið fyrir í Bláa lóninu undanfarin 20 ár. Við erum að horfa til þess að Bláa lónið er nú þegar borið saman við einstaka staði á heimsvísu,“ segir Grímur Sæmundsen, forstjóri Bláa lónsins.

100 ný stöðugildi

240 starfsmenn eru í fullu starfi hjá Bláa lóninu og mun þeim fjölga talsvert þegar nýtt hótel verður tekið í gagnið.

„Þessi viðbótaruppbygging mun skila hátt í 100 stöðugildum þegar allt verður komið í gang,“ bætir Grímur við.

Aðsóknarmet á síðasta ári

Bláa lónið var valið eitt af 25 undrum veraldar af National Geographic fyrir örfáum árum. Á síðasta ári var sett nýtt aðsóknarmet þegar 647 þúsund gestir heimsóttu lónið.

„Árið 2013 var algjört metár hjá okkur,“ segir Grímur. „Við höfum eins og aðrir ferðaþjónustuaðilar notið vaxtar greinarinnar undanfarin misseri. Við töldum að það væri líklega að hægjast um en núna í janúar var gestafjöldinn okkar 35% meiri en á sama tíma á síðasta ári sem var metár. Vöxturinn í ferðaþjónustunni heldur áfram af fullum krafti.“