Philip Seymour Hoffman í Mattress Man auglýsingu

Patrick Fugit, einn meðleikara Philips Seymour Hoffman í kvikmyndinni Almost Famous talaði við Entertainment Weekly um andlát Hoffmans og minntist góðs vinar í orðum og myndum.

Fugit vaknaði á sunnudagsmorgun og frétti í gegnum Facebook að fyrrum samstarfsmaður hans hefði látist í New York.

Hann sagði sín fyrstu viðbrögð hafa verið skrýtin. Hann hugsaði ekki tilbaka til stundanna sem þeir áttu saman við tökur á Almost Famous heldur til myndarinnar Punch Drunk Love.

„Hún er ein af mínum uppáhalds myndum sem Hoffman leikur í,“ segir Fugit.

„Hafið þið séð Mattress Man auglýsinguna sem hann leikur í? Það er bara sena sem var ekki notuð í Punch Drunk Love, en í senunni stekkur hann af stórum bíl og ætlar að lenda á dýnum, nema að hann hittir ekki og fellur til jarðar. Það er eins og Philip slasist töluvert við fallið. Atriðið lítur út fyrir að vera mjög raunverulegt, og er mjög snjallt og ótrúlega fyndið. Ég veit ekki af hverju, en það er það fyrsta sem mér kom í hug.“