Fjölmenni við jarðaför Hoffmans

Kvikmyndaleikararnir Meryl Streep, Cate Blanchett, Ethan Hawke voru meðal þeirra sem vottuðu Philip Seymour Hoffman virðingu sína við jarðaför hans fyrr í dag. Athöfnin, sem var eingöngu ætluð fyrir fjölskyldu og vini, fór fram í kirkju heilags Ignatius Loyola í New York. Ráðgert er að halda viðameiri minningarathöfn um leikarann síðar í þessum mánuði.

„Hann skilur eftir sig mikinn kærleika. Þetta er hræðilegur missir,“ segir Jose Rivera, leikskáld sem skrifað hefur leikverk fyrir leikhús Hoffmans, LAByrinth Theatre Company. Hann sagði athöfnina hafa verið einfalda og að þátttakendur hafi deilt minningum sínum um leikarann.

Meðal þeirra viðstaddra voru Diane Sawyer, Michelle Williams, Julianne Moore, Joaquin Phoenix, John Slattery, Laura Linney, Jerry Stiller, Chris Rock og Marisa Tomei, ásamt leikstjóranum Spike Lee sem sagði Hoffman hafa verið indælan náunga og frábæran listamann. „Ég fékk bara tækifæri til þess að starfa einu sinni með honum, en ég elska hann og þetta er mikill, mikill missir,“ sagði Lee.

Hoffman lést síðastliðinn sunnudag af völdum of stórs heróínskammts. Hann skilur eftir sig sambýliskonu til fimmtán ára, Mimi O'Donnell, og þrjú börn. Hoffman talaði opinskátt um fíkn sína. Hann hélt sig frá eiturlyfjum í 23 ár, en fór í meðferð á síðasta ári eftir að hafa fallið árið 2012.