Þriðja olíuleitarleyfið á Drekann veitt í dag

Þriðja sérleyfinu til leitar og vinnslu olíu á Drekasvæðinu verður formlega úthlutað við athöfn klukkan tvö í Þjóðmenningarhúsinu í Reykjavík. Orkustofnun veitir leyfið til hóps þriggja aðila. Kínverska ríkisolíufélagið CNOOC verður með 60% og rekstraraðili leyfisins. Norska ríkisolíufélagið Petoro verður með 25% og Eykon Energy, sem er í íslenskri eigu, verður með 15%.

Leyfisúthlutunin hefur vakið athygli á alþjóðavettvangi sökum þess að þarna taka höndum saman kínverskt og norskt ríkisolíufélög en samskipti Noregs og Kína hafa verið afar stirð frá því norska Nóbelsverðlaunanefndin veitti kínverskum andófsmanni friðarverðlaunin árið 2010.

Fyrstu tveimur sérleyfunum á landgrunni Íslands var úthlutað í  janúar í fyrra. Olíumálaráðherra Noregs kom þá sérstaklega til landsins og lýsti verkefninu sem sögulegu fyrir Norðmenn þar sem þetta væri í fyrsta sinn sem norska ríkið tæki beinan þátt í olíuleit utan lögsögu Noregs.

Tólf íslensk umhverfisverndarsamtök sendu í dag frá sér yfirlýsingu vegna leyfisveitingarinnar þar sem þau krefjast þess að ríkisstjórn Íslands og Alþingi hætti tafarlaust við allar áætlanir um vinnslu olíu og gass. Með því segja þau að íslensk stjórnvöld myndu sýna ábyrgð og senda skilaboð um að Ísland ætli sér að vera í fararbroddi í loftslagsmálum.