Undanúrslitadraumurinn úti hjá Íslandi - stórsigur Spánverja

Spánverjar tryggðu sér annað sætið í milliriðli Íslands og þar með sæti í undanúrslitum Evrópumótsins í handbolta í Danmörku með því að vinna ellefu marka sigur á Makedóníu í dag, 33-22. Þar með fór síðasti möguleiki íslenska liðsins að komast í undanúrslitin.

Spánverjar eru með átta stig og íslenska liðið getur mest náð sjö stigum vinni liði Dani í kvöld.

Íslenska liðið á samt enn möguleika á því að spila um fimmta sætið á mótinu en til þess má íslenska liðið ekki tapa niður átta marka forskoti á Ungverjaland í leikjum kvöldsins.

Spánverjar voru þremur mörkum yfir í hálfleik, 15-12, en gerðu nánast út um leikinn með því að skora þrjú fyrstu mörkin í seinni hálfleiknum.

Kiril Lazarov, langbesti leikmaður Makedóníu og einn besti handboltamaður heims, spilaði ekki í þessum leik vegna meiðsla. Það var því strax ljóst að það yrði á brattann að sækja fyrir makedónska liðið.

Joan Canellas var markahæstur hjá Spáni með sex mörk en Filip Mirkulovski skoraði sjö mörk fyrir Makedóníu.