Akureyringar í samstarf um nám í olíuiðnaði

Verkmenntaskólinn á Akureyri er kominn í samstarf fjögurra menntastofnana á vestanverðum Norðurlöndum um að byggja upp þekkingu á sviði olíuiðnaðarins, í tækni-, öryggis- og umhverfismálum. Verkefnið kallast FING, eftir upphafsstöfum þátttökulandanna fjögurra: Færeyja, Íslands, Noregs og Grænlands. Það snýst um að miðla reynslu Norðmanna af olíu- og gasiðnaði til hinna vestnorrænu landanna, sem öll standa að olíuleit.

Olíutækniskólinn í Stafangri, Stavanger offshore tekniske skole, hefur undirbúið verkefnið frá árinu 2012 en hinir skólarnir eru Vinnuháskúlin í Færeyjum og Greenland School of Minerals and Petroleum, auk Verkmenntaskólans á Akureyri. Verkefnið er styrkt af Norðurlöndunum í gegnum NORA og Nordplus.

Fyrsta námskeiðið fór fram í Sisimiut á Grænlandi dagana 10. og 11. desember síðastliðinn og var miðlað með fjarfundabúnaði til Akureyrar, Þórshafnar og Stafangurs. Fyrirlesarar voru tveir norskir sérfræðingar, Anna Marita Braaten jarðfræðingur og Børge Harestad olíuverkfræðingur.

„Noregur hefur byggt upp víðtæka þekkingu innan menntakerfisins í þessum geira,“ segir Stella Aguirre, verkefnisstjóri FING, í viðtali við Aftenbladet í Noregi. „Nú ætlum við að taka þátt í að byggja upp þekkingu og færni í þessum löndum og skapa tækifæri fyrir nýjan iðnað að fá heimafólk til starfa.“

Fyrstu skrefin hafa verið tekin í að byggja upp sérstakan fagskóla á Grænlandi undir leiðsögn Norðmanna. Olíutækniskólinn í Stafangri tekur þar þátt í að koma á fót sérhæfðri kennslu sem lýtur að olíuiðnaði. Jarðfræðingurinn Anna Marita Braaten segir að á Grænlandi séu náttúrulegar forsendur fyrir álíka olíuævintýri og Noregur upplifi.

„Sennilega á Grænland risamöguleika á olíu,“ segir hún. „Þar hafa tíu holur verið boraðar og vísbendingar fundist um olíu. Hins vegar er Grænland dýrasta svæði heims til að leita að olíu og gasi og heimastjórnin hefur ákveðið að norskir staðlar skuli gilda um iðnaðinn. Það eru dýrustu staðlarnir en einnig þeir öruggustu. Hér taka menn enga áhættu hvað varðar fiskveiðar og umhverfi.“