Harmageddon

Sannleikurinn: Erill hjá lögreglu vegna Furby leikfanga

Snær Blær skrifar
Flestir klefar í fangageymslum lögreglunnar á Hverfisgötu voru fullir af leikföngum í nótt.
Flestir klefar í fangageymslum lögreglunnar á Hverfisgötu voru fullir af leikföngum í nótt.
Talsverður erill var hjá lögreglunni á höfuðborgarsvæðinu í gærkvöldi og nótt. Ekki síst vegna ölvunar svokallaðra Furby leikfanga sem voru vinsæl jólagjöf til barna í ár en hafa reynst vera stórhættuleg. Þannig hafði lögreglan afskipti af þremur bifreiðum vegna gruns um að bílstjórinn væri Furby undir áhrifum áfengis og þremur að sama skapi vegna gruns um akstur undir áhrifum fíkniefna. Einnig var erill á lögreglunni vegna hávaða frá heimahúsum þar sem Furby leikföng gengu berserksgang og réðust gegn eigendum sínum.

Ég er Furby, taktu mig til leiðtoga þíns krakki!
Furby var vinsælasta leikfangið fyrir jólin í ár en er í raun nokkuð fullkomið stríðstól sem lagt hefur líf fjölda fólks í rúst. Leikfangið er krúttlegt vélmenni með þarfir og þrár og þurfa börnin sjálf að sjá um að sinna dýrinu sem bregst við hljóðum, snertingu og lítur á allar snöggar hreyfingar í kringum sig sem ógn við sig. Þá er dýrið fljótt að skipta skapi og hefst þá eyðileggingarherferð sem endar ekki fyrr en lögreglan grípur inn í.

Lögregla fékk ennfremur tilkynningu um klukkan fjögur í nótt um ölvaðan sofandi Furby við Lækjargötu í Reykjavík. Leikfangið reyndist illa áttað og gat lítið tjáð sig sökum ölvunar. Var það vistað í fangageymslu uns ástand þess lagaðist og eigandi þess, átta ára stúlka, treysti sér til að sækja það.



Sannleikurinn rekur öfluga og óvæga fréttastofu þar sem engum er hlíft og sannleikurinn skiptir ekki höfuðmáli. Sannleikurinn er háður öllum stjórnmálaflokkum og hagsmunaaðilum um fréttaefni sitt. Fréttastofa Sannleikans hefur Facebook-síðu sem bregst illa við ef henni er ekki sinnt.






Velkomin á Vísi. Þessi vefur notar vafrakökur. Sjá nánar.