Vill hvetja félagsmenn VR til að hafna kjarasamningum

Ragnar Þór Ingólfsson, stjórnarmaður í VR, vill meina að forsendur fyrir nýjum kjarasamningum séu brostnar.

Ragnar tjáir sig um málið á fésbókarsíðu sinni en hann mun ekki vera sáttur við orðræðu Gylfa Arnbjörnssonar, forseta ASÍ, í Kastljósinu í gær þegar hann átti í kappræðum við Vilhjálmur Birgisson, formaður verkalýðsfélags Akraness.

Vilhjálmur vildi meina í Kastljósinu í gær að umræddir kjarasamningar sé til marks um kjarkleysi og aumingjadóm verkalýðsforystunnar.

„Mín skoðun er sú að við höfum verið illilega tekin í bólinu. Mun væntanlega leggja fram tillögu á stjórnarfundi VR í kvöld um að stjórnin hvetji félagsmenn sína til að hafna nýgerðum kjarasamningi. Ástæðan er ekki endilega sú að Gylfi Arnbjörns hefur sungið sitt síðasta í eyru launafólks með framkomu sinni síðustu vikur sem hann toppaði með eftirminnilegum hætti í gærkvöldi,“ segir á fésbókarsíðu Ragnars.

Ragnar vill meina að ástæðan sé aðallega sú að allar forsendur fyrir aðfararsamningnum hafi nú þegar við brostnar eða við það að bresta.

„Samanber framkomu stórfyrirtækja með kaupaukakerfi og ofurlaunum lykilstjórnenda með stjórnir lífeyrissjóða á bakvið sig, hækkanir byrgja sem nú liggja fyrir, hækkanir á rafmagni, sykurskatti og öðrum neysluskatti. Það stendur ekki steinn yfir steini og blekið ekki þornað.“

„Ég hef verið að fara yfir verðskrár erlendra byrgja og eru hækkanir á erlendum innkaupsverðum fyrir þetta ár frá bilinu 6-10% og hærra. Framkvæmdastjóri Hagkaupa benti á eftirfarandi hækkanir, Emmess ís 4,5% - Hámark orkudrykkur 5% - Freyju nammi 7% - Brúnegg 4,2% - Lýsi 4%. Rafmagnið 4,5% og svo mætti því miður lengi telja. Þetta er dapur vitnisburður um enn eitt bullið sem launafólk er alið á þegar kemur að loforðum ASÍ/SA um að allir taki nú þátt í að verja stöðugleika og kaupmátt. Algjörlega innihaldslaus loforð eins og venjulega.“