Bandaríkjamenn hjálpa til við leit að nígerísku stúlkunum

Bandaríkjamenn taka nú virkan þátt í leitinni að nígerísku skólastúlkunum sem hryðjuverkasamtökin Boko Haram námu á brott í síðasta mánuði.

Bandarískar herflugvélar fljúga nú um svæðið og leita þeirra og þá eru háþróaðar gervitunglamyndir bandaríkjahers einnig nýttar af stjórnvöldum í Nígeríu til þess að komast að því hvar þær eru niðurkomnar. Stúlkunum var rænt þann fjórtánda apríl síðastliðinn og í gær sendu samtökin frá sér myndband þar sem hluti þeirra sést. Í myndbandinu segir leiðtogi samtakanna að þeim verði ekki sleppt uns allir liðsmenn Boko Haram sem nú sitji í fangelsi eru lausir úr haldi. Þessum kröfum hefur þegar verið hafnað af stjórnvöldum í Nígeríu.