Stefán nýr fjármálastjóri Advania

Stefán E. Sigurðsson hefur verið ráðinn nýr fjármálastjóri Advania. Jóhann Þór Jónsson, sem gegnt hefur starfi fjármálastjóra, hefur tekið við nýju starfi sem forstöðumaður viðskiptaþróunar og rekstrar.

Stefán starfaði áður sem Senior Director of Finance hjá CCP þar sem Stefán leiddi fjármáladeildir fyrirtækisins á heimsvísu og hafði yfirumsjón með samstæðuuppgjöri félagsins, sjóðstýringu, fjárfestatengslum og samskiptum við skatta-og eftirlitsstofnanir í þeim löndum sem félagið er með starfsemi. Stefán hóf störf hjá CCP árið 2010.

„Á árunum 2003-2010 starfaði Stefán sem Audit Manager hjá Eide Bailly í Phoenix, Arizona. Þar leiddi hann endurskoðunarteymi og endurskoðaði fyrirtæki í Arizona, Californiu, Colorado, New Mexico og Texas.  Þar á meðal voru framleiðslu- og þjónustufyrirtæki, borgir og sveitafélög, orkuveitur, tryggingafélög og fyrirtækjakeðjur.

Stefán útskrifaðist með B.S. í Accountancy frá Arizona State University árið 2003 og varð löggiltur endurskoðandi, CPA (Certified Public Accountant) árið 2006,“ segir í tilkynningu frá Advania.

Í tilkynningunni segir að í kjölfar breytinga á meirihlutaeign og tilkomu nýrrar stjórnar hjá Advania hefur Jóhann Þór Jónsson tekið við nýju starfi sem forstöðumaður viðskiptaþróunar og rekstrar. Þessi nýja staða tilheyrir skrifstofu forstjóra. „Jóhann Þór mun sjá um eftirfylgni og samræmingu rekstrarverkefna og þjónustu hjá Advania, bæði á Íslandi og erlendis.

Jóhann Þór hefur gengt stöðu fjármálastjóra Advania frá árinu 2009 þegar vinna við samþættingu og sameiningu þeirra félaga sem nú mynda Advania hófst fyrir alvöru. Áður, eða frá árunum 2004-2009, starfaði Jóhann Þór við  viðskiptaþróun og fjármálastjórn hjá Kögun og hjá Eimskip frá 1995-2004.  Jóhann Þór er viðskiptafræðingur frá Háskóla Íslands.“