Tískuveldið NTC stefnir að opnun nýrrar netverslunar

Fataverslanakeðjan NTC, sem rekur meðal annars Gallerí 17, stefnir á opnun netverslunar á næstunni og vinnur nú að uppfærslu síðunnar. „Við erum að reyna að setja hana í gang fyrir jól þannig að hún verði vonandi tilbúin um miðjan nóvember,“ segir Svava Johansen, eigandi verslunarinnar. Á síðunni verða seld merki sem ekki eru seld í verslununum.

Stefnan verður að selja tískufatnað, skó og fylgihluti fyrir herra og dömur, en einnig að það verði umfjöllun og blogg um klæðnað og tísku. „Við viljum gera þarna skemmtilega og líflega síðu og að fólk geti bara farið þarna inn á og verslað eins og á vefsíðum erlendis. Þetta er bara enn einn valkosturinn,“ segir hún.

Svava segir að sala í versluninni hafi alls ekki dregist saman. „En maður veit aldrei hvort það hefði verið enn meiri aukning ef það væri ekki samkeppni við netverslun almennt,“ segir hún.

Svava býst ekki við því að með tilkomu netverslunarinnar muni þeim fækka sem komi í verslanir hennar, til dæmis í Kringlunni og Smáralind. „Ég á von á aukningu,“ segir hún og bætir því við að flestir sem séu í verslunarrekstri og opni síðan netverslanir samhliða séu sammála því að sýnileiki verslananna verði meiri. „Að þetta verði bara stór búðargluggi fyrir fólk sem kemst ekki og þetta verði þannig að mestu leyti viðbót.“

Netverslunin verði vonandi til þess að þjónusta landsbyggðina og líka til að þjónusta fólk sem er ekki mikið fyrir að fara í verslanir og þá sem hafa ekki tíma til að fara í verslanir. Þá segist Svava hafa fengið margar fyrirspurnir að utan varðandi vörur sem NTC framleiðir sjálft. Hvort og hvar fólk geti keypt þær vörur sem NTC framleiðir.

„Við erum að framleiða undir þremur vörumerkjum. Það er nú kannski það skemmtilegasta ef við gætum farið að selja út fyrir landsteinana í gegnum netverslunina. En við erum ekki þannig fyrirtæki að við séum númer eitt í framleiðslu og að koma því út heldur varð þetta viðbót sem hefur gengið vel. Við framleiðum sjálf fimmtán prósent af öllum vörum sem við seljum,“ segir Svava.