Stjórn Sorpu skoðar bílamál starfsmanna

Kjaramál starfsmanna Sorpu bs. verða rædd á stjórnarfundi byggðasamlagsins á morgun og verða þá bifreiðahlunnindi meðal annars skoðuð.

„Þar munum við væntanlega ræða kjaramálin, ásamt öðrum málum, og það er eðlilegt að við ræðum um lifandi málefni tengd Sorpu,“ segir Bjarni Torfi Álfþórsson, stjórnarformaður Sorpu.

Ellefu starfsmenn fyrirtækisins eru með bíl frá Sorpu til umráða samkvæmt ákvæðum í ráðningarsamningum, eins og kom fram í fréttablaðinu Kópavogi í síðustu viku. Þar er vitnað í svör Björns Halldórssonar, framkvæmdastjóra Sorpu, við fyrirspurn blaðsins. Björn greinir þar frá því að fyrir­tækið greiði allan kostnað við ökutækin og áætlar að árlegur kostnaður af hverri bifreið sé um 790 þúsund krónur.

Samkvæmt upplýsingum Fréttablaðsins keyrir Björn sjálfur á svörtum metanbíl, árgerð 2008, af gerðinni Mercedes Benz E200 NGT.

„Það er verið að gera rekstrarúttekt á byggðasamlögunum þremur; Strætó, Sorpu og Slökkviliði höfuðborgarsvæðisins. Sú umræða fór í gang löngu á undan allri bílaumræðu en er eðlilegur þáttur í rekstri svona stórra þjónustufyrirtækja við höfuðborgarbúa,“ segir Bjarni, spurður hvort kjaramál verði til umræðu í ljósi frétta af ákvörðun Strætó bs. um að selja tíu milljóna króna jeppa sem framkvæmdastjóri fyrirtækisins hafði til umráða.