Mögulega Íslandsmet í dómkröfum

„Það er alveg ljóst að sjóðurinn mun ekki greiða meira en það sem hann á í sínum sjóðum hverju sinni. Sjóðurinn verður ekki gerður gjaldþrota og ekki gerð aðför í eigum hans. Hann mun því ekkert geta gert,“ segir Guðrún Þorleifsdóttir, formaður stjórnar Tryggingarsjóðs innistæðueigenda og fjárfesta.

Hollenski seðlabankinn DNB og breski innistæðusjóðurinn FSCS, hafa stefnt Tryggingasjóði innistæðueigenda og fjárfesta á Íslandi fyrir Hérðasdóm Reykjavíkur í tengslum við Icesave deiluna, eins og Vísir greindi frá. Ítrustu kröfur DNB og FSCS séu, með vöxtum og kostnaði, eru um 1.000 milljarðar.

Fari svo að fallist verði á kröfur Breta og Hollendinga segir Guðrún að erfitt verði fyrir sjóðinn að að sinna skyldum sínum og tryggja innistæður á Íslandi til framtíðar.



„Ég á erfitt með að sjá fyrir mér dómsniðurstöðu í þessu, það er ráðgáta hvað það þýðir ef svona lítill aðili verður dæmdur til að greiða svona háa fjárhæð. Sjóðurinn náttúrulega eignast alltaf eitthvað á hverju ári miðað við óbreytt lög sem gætu þá gengið upp í þessa kröfu en hann er þá auðvitað ekki að safna upp í neitt tryggingakerfi á meðan,“ segir Guðrún.

Guðrún segir aðalkröfu þeirra að sýknað verði í málinu á þeim grundvelli að kröfurnar séu fyrndar. Þá telur sjóðurinn, ef ekki verði fallist á að kröfurnar séu fyrndar, að greiðsluskylda hans takmarkist við þær fjárhæðir sem sjóðurinn hafði yfir að ráða á þeim tíma sem greiðsluskyldan stofnaðist.

„Þetta verður ansi mikið, í samanburði við íslensku fjárlögin til dæmis eru þetta svakalegar upphæðir, kannski Íslandsmet, ég veit það ekki,“ segir Guðrún.