Adam Scott: "Ég þarf að æfa mig betur"

Masters sigurvegarinn frá því í fyrra, Ástralinn Adam Scott segist þurfa að æfa sig meira ef hann ætlar sér að verja titilinn í ár á þessu sögufræga móti. Scott var töluvert frá sínu besta á Cadillac meistaramótinu á síðustu helgi og endaði hann jafn í 25. sæti ásamt nokkrum nokkrum öðrum kylfingum en honum tókst ekki að spila neinn hring undir pari.

„Ég mun ekki eiga neinar sérstakar minningar um þetta mót, ég spilaði alls ekki vel, “ sagði Scott við fréttamenn eftir Cadillac meistaramótið en það er rúmlega mánuður í að hann reyni að verja titil sinn á Mastersmótinu, fyrsta risamóti ársins sem fram fer 10-13 apríl nk. „Ég þarf greinilega að æfa mig töluvert á næstunni til þess að vera í mínu besta formi á komandi vikum, næstu tveir dagar fara í hvíld en svo mun ég taka vel á því á æfingasvæðinu.“



Scott verður ekki með á næsta móti á PGA mótaröðinni, Valspar meistaramótinu sem hefst á fimmtudaginn og hefur því nægan tíma til þess að æfa sig.