27% hlutur seldur í HB Granda fyrir 13,6 milljarða

Almennu útboði á hlutabréfum í HB Granda hf. lauk í gær, þar sem um 3.000 fjárfestar óskuðu eftir að kaupa hlutabréf fyrir samtals um 23 milljarða króna en þetta kemur fram í frétt frá Arion banka.

Útboðið nemur 27% af útgefnum hlutum í HB Granda og er söluandvirði þess 13,6 milljarðar króna. Endanlegt útboðsgengi er 27,7 krónur á hlut í báðum tilboðsbókum útboðsins. Miðað við þetta gengi nemur virði allra hlutabréfa í félaginu um 50 milljörðum króna.

Hlutirnir verða seldir til um 2.500 fjárfesta, en ekkert kemur í hlut þeirra sem buðu undir 27,7 krónur á hlut. Um 5% af útgefnum hlutum HB Granda verður úthlutað til fjárfesta sem skráðu sig í tilboðsbók A fyrir kaupum að andvirði 0,1-25 milljónum króna og hverjum aðila úthlutað hlutabréfum að andvirði um 0,1-13,3 milljónum króna.

Um 22% af útgefnum hlutum félagsins verður úthlutað til fjárfesta sem skráðu sig í tilboðsbók B fyrir kaupum að andvirði 15 milljónum króna eða meira og verða áskriftir á og yfir útboðsgengi óskertar. Stærsta úthlutun í útboðinu nemur 5% hlut til eins fjárfestis.

„Ég býð nýja hluthafa velkomna í hóp þeirra 570 hluthafa sem fyrir eru hjá félaginu og fagna þeim áfanga að sjá HB Granda á Aðalmarkaði á ný, en félagið hefur verið á íslenskum verðbréfamarkaði frá árinu 1992. Ég fagna því trausti sem fjárfestar sýna okkur með útboðinu, en framundan eru spennandi tímar hjá félaginu með breyttum áherslum í rekstri samhliða endurnýjun skipaflotans,“ Vilhjálmur Vilhjálmsson, forstjóri HB Granda.

„Það er gleðilegt að hafa átt forgöngu um að veita íslenskum almenningi tækifæri til að fjárfesta í íslenskum sjávarútvegi. Það er gert í samkomulagi við aðra stóra hluthafa. Við erum ánægð með það verð sem við fáum fyrir þann hlut sem við seljum í útboðinu en að sama skapi erum við ánægð með að eiga áfram hlut í félaginu, enda höfum við mikla trú á félaginu sem er eitt öflugasta sjávarútvegsfyrirtæki landsins,“ segir Höskuldur H. Ólafsson, bankastjóri Arion banka.