Fjölnir fær mikinn liðsstyrk

Körfuknattleiksdeild Fjölnis hefur styrkt sig mjög mikið fyrir átökin í 1. deild á komandi vetri. Emil Þór Jóhannsson og David Ingi Bustion hafa ákveðið að ganga til liðs við félagið sem féll úr úrvalsdeildinni í vor. Þetta kemur fram á heimasíðu Fjölnis.

Emil Þór er uppalinn í Fjölni og hefur ákveðið að snúa heim til að hjálpa liði sínu að komast upp í úrvalsdeildina á nýjan leik. Emil varð Íslandsmeistari með Snæfelli 2010 og styrkir félagið mikið.

David Ingi lék vel í úrslitakeppninni með Grindavík sem varð Íslandsmeistari nú í vor og ætti ekki síður að setja mark sitt á 1. deildina með Fjölni.