Reiknar með höfðun skaðabótamáls

„Ég reikna fastlega við því að við förum í skaðabótamál,“ segir Jóhannes Ingi Kolbeinsson, framkvæmdastjóri Kortaþjónustunnar, en Samkeppniseftirlitið lagði í dag 500 milljóna sekt á Valitor fyrir brot á samkeppnislögum.

Samkeppniseftirlitið komst að þeirri niðurstöðu að Valitor hafi misnotað markaðsráðandi stöðu sína með aðgerðum sem beindust gegn keppinautum félagsins á markaði fyrir færsluhirðingu.

Kortaþjónustan hefur sent frá sér yfirlýsingu vegna úrskurðarins þar sem kemur fram að niðurstöðunni sé fagnað. Með henni vonist Kortaþjónustan til þess að „skref sé stigið í átt að eðlilegri samkeppni á kortamarkaðnum á Íslandi.“

Jóhannes segir fyrrverandi forstjóra Valitor hafa kallað Kortaþjónustuna „síkvartandi“ árið 2009 þegar kvörtun var lögð vegna brotanna, en nú sé ljóst að full ástæða hafi verið til þess að kvarta.

„Það er alveg ljóst að við höfum skaðast á þessu. Við erum í öðru skaðabótamáli gegn þeim og þetta tekur allt svo ægilega langan tíma, en ég geri ráð fyrir því að við höfðum annað.“

Jóhannes segir mörg fyrirtæki í viðskiptum við Valitor á grundvelli ólöglegra tilboða.

„Þeir undirverðlögðu okkur á ólöglegan hátt og náðu þannig viðskiptum af okkur. Maður vonar auðvitað að þessi fyrirtæki hugsi sig um hvort þau vilji vera áfram í viðskiptum við lögbrjóta.“

Yfirlýsing Kortaþjónustunnar í heild sinni:

Yfirlýsing frá Kortaþjónustunni vegna úrskurðar Samkeppniseftirlitsins um brot Valitors

Vegna úrskurðar Samkeppniseftirlitsins um brot Valitors á samkeppnislögum vill Kortaþjónustan koma eftirfarandi á framfæri:

Kortaþjónustan fagnar úrskurði Samkeppniseftirlitsins. Með honum bindum við vonir um að skref sé stigið í átt að eðlilegri samkeppni á kortamarkaðnum á Íslandi.

Því miður hafa gjörðir keppinauta okkar á markaði þó ekki bent til þess hingað til að þeir séu tilbúnir til að keppa heiðarlega við Kortaþjónustuna. Brotin sem Valitor er dæmt fyrir nú voru til að mynda framin strax eftir að Valitor ásamt Borgun og Greiðsluveitunni viðurkenndu í Kortasamráðsmálinu langvarandi og alvarleg brot á samkeppnislögum sem miðuðu að því að koma Kortaþjónustunni af markaði.

Í ljósi þess að niðurstaða Kortasamráðsmálsins frá 2008 virðist ekki hafa haft meiri áhrif á starfshætti Valitors en raun ber vitni teljum við ljóst að nýja hugsun þarf í meðhöndlun og viðurlög samkeppnislagabrota. Það er ekki nóg að sekta félögin sjálf, heldur verða stjórnendur og stjórnir brotlegra fyrirtækja að vera ábyrg gjörða sinna. Ef stjórnendur eru ekki sóttir til saka er fælingarmáttur samkeppnislaganna ekki nægilega mikill og líklegra en ella að freistast sé til að beita ólöglegum aðferðum.

Það er ljóst að lögbrot Valitors hefur skaðað Kortaþjónustuna fjárhagslega og gert stöðu fyrirtækisins á markaðnum lakari en ella. Kortaþjónustan áskilur sér rétt til að fara fram á skaðabætur vegna þessa máls, enda er ólíðandi að sitja undir endurteknum lögbrotum af hálfu keppinauta okkar á markaði.

Þessi dómur sýnir fram á að Kortaþjónustan þurfti ekki einungis að þola alvarleg brot frá stofnun fyrirtækisins árið 2002 og fram að úrskurði í Kortasamráðsmálinu 2008 – brotin héldu áfram árin eftir það. Við þekkjum hversu erfitt er að starfa við slíkar aðstæður og óskum einskis þess sama. Því miður er hættan sú að á meðan íslensk fyrirtæki halda áfram að eiga viðskipti við lögbrjóta og markaðsníðinga versni ástandið frekar en að batna. Það þarf því hver og einn að líta í eigin barm og spyrja sig hvort eðlilegt sé að verðlauna viðskiptahætti þeirra sem hafa gerst brotlegir við samkeppnislög með áframhaldandi viðskiptum.