Fyrsti karlmaðurinn í hluthafahópnum

Jón S. von Tetchner, fjárfestir og annar stofnenda norska hugbúnaðarfyrirtækisins Opera, hefur keypt 23 prósenta hlut í samskiptamiðlinum og frumkvöðlafyrirtækinu Spyr.is.

Spyr.is var stofnað þann 6. október árið 2012 af tólf konum sem langaði til þess að efla gagnsæi í samfélaginu og gefa almenningi greiðari aðgang að upplýsingum.

„Spyr.is er bráðskemmtileg hugmynd og eitthvað sem passar samtímanum mjög vel. Það er mikið af góðu efni á Spyr.is þar sem lesendur fá að ráða ferðinni,“ segir Jón. Hann hefur mikla trú á því að þjónusta fyrirtækisins eigi eftir að vaxa vel hér á landi sem og erlendis.

Spyr.is hefur það hlutverk að kalla eftir upplýsingum fyrir hönd almennings og nú þegar hafa um fimm hundruð aðilar svarað lesendum síðunnar.

Rakel Sveinsdóttir, framkvæmdastjóri Spyr.is er afar ánægð með nýja hluthafann í hópnum. „Við viljum auka fjölbreytni í eigendahóp fyrirtækisins og þar skiptir miklu máli að fá öflugan mann í hópinn, eins og Jón. Hann er sjálfur frumkvöðull með mikla reynslu, en notendur Opera telja nú um 300 milljónir,“ segir Rakel, sem sjálf á um 30 prósenta hlut í Spyr.is.

Ásamt kaupunum stefnir Jón nú að því að opna frumkvöðlasetur á Eiðistorgi með aðstöðu fyrir sprotafyrirtæki og tengingu við sams konar setur í Noregi og Boston, sem einnig eru á vegum Jóns. Spyr.is mun flytja aðsetur sitt þangað í næsta mánuði ásamt öðrum sprotafyrirtækjum.