Raforkukostnaður heimila hefur aukist um allt land

Heildarkostnaður við raforku hjá heimilum landsins hefur hækkað um land allt síðastliðna tólf mánuði. Fram kemur í samantekt hagdeildar Alþýðusambands Íslands að miðað við 4.000 kílówattastunda notkun á ári sé hækkunin mest hjá viðskiptavinum Orkubús Vestfjarða í þéttbýli.

„Heildar raforkukostnaður þeirra hefur hækkað um 6,6 prósent,“ segir á vef ASÍ. Minnst er hækkunin hjá heimilum á svæði Rarik þéttbýli/Orkusalan, 1,2 prósent.

Bent er á að hluta skýringarinnar á hækkuninni sé að finna í því að skattur á raforkusölu hafi hækkað um fimm prósent um síðustu áramót.

Raforkukostnaður heimila skiptist annars vegar í gjald fyrir rafmagnið og hins vegar kostnað við flutning og dreifingu.

Sá kostnaður, til almennra heimilisnota, er sagður mestur hjá viðskiptavinum Rarik þéttbýli/Orkusalan, 73.069 krónur. Minnisti flutnings- og dreifingarkostnaðurinn er hjá Norðurorku/Fallorku, 62.299 krónur. Þar munar 17 prósentum.

Þegar tekið er saman verð á rafmagni og dreifingu þá segir ASÍ að ekki muni nema fjórum prósentum á hæsta og lægsta verði. Möguleg seðilgjöld gætu því gert að engu ávinninginn af því að kaupa rafmagn á einum stað og dreifingu á öðrum.

„Það er bagalegt fyrir samkeppni á orkusölumarkaði að ekki skuli vera mögulegt að innheimta allan raforkukostnað á einum reikningi, óháð samsetningu á sölufyrirtæki og dreifiveitu sem skipt er við,“ segir í umfjöllun ASÍ.

„Þessu til viðbótar er ávallt erfiðara fyrir neytendur að fá góða yfirsýn yfir heildarkostnað sinn þegar tveir reikningar berast mánaðarlega.“

Hér má finna samantekt ASÍ með töflum á PDF-formi.