Jólahornin og Skarðshyrnan

Vísir sendir lesendum sínum jólakveðju með úrvali af ljósmyndum sem sendar voru inn í jólamyndakeppni Fréttablaðsins og Vísis. Allar myndirnar sem sendar voru inn í keppnina má sjá hér.

Fréttavakt verður á Vísi yfir hátíðarnar; á jóladag kl. 10-19 og á annan í jólum kl. 9-22.

Fréttastofa 365 sendir lesendum Vísis um allan heim sínar bestu óskir um gleðileg jól.

Ljósmyndin Skarðshyrnan, sem Jón Hilmarsson sendi inn í jólaljósmyndasamkeppni Fréttablaðsins, var valin sú besta af dómnefnd og lesendum. Jón er skólastjóri Leik- og grunnskóla Hvalfjarðarsveitar og hefur því útsýnið alla daga.

„Þetta er frábært og ég er mjög ánægður með sigurinn,“ segir Jón Hilmarsson. Sigurmynd Jóns er af norðurljósum yfir Skarðshyrnunni á Skarðsheiði, en hann býr í Melahverfinu í Hvalfirði þar sem hann starfar sem skólastjóri.

„Ég hef þetta útsýni fyrir augunum alla daga og það hafði lengi verið á stefnuskránni hjá mér að ná góðri norðurljósamynd þegar ljósin lægju yfir. Kvöldið sem ég tók myndina hafði ég verið á þvælingi um kvöldið og var á leiðinni heim þegar ljósin birtust skyndilega. Það borgar sig greinilega að vera úti því ekki nær maður svona myndum heima hjá sér,“ segir Jón og hlær.

Jón segist mikill áhugamaður um ljósmyndun og sendi frá sér ljósmyndabókina Ljós og náttúra Norðurlands vestra nú fyrir jólin, en áður hafði hann sent frá sér bókina Ljós og náttúra Skagafjarðar árið 2011. 

Alls bárust 272 myndir í keppnina en þátttakendur hlóðu upp myndum sínum á ljosmyndakeppni.visir.is. Lesendur kusu bestu myndina og gildir niðurstaðan í kosningunni til hálfs á móti áliti dómnefndar blaðsins, sem skipuð er þeim Ólafi Stephensen ritstjóra, Silju Ástþórsdóttur útlitshönnuði og Pjetri Sigurðssyni ljósmyndara.