Gríðarlegt inngrip Seðlabankans á gjaldeyrismarkaði

Seðlabankinn er búinn að kaupa krónur fyrir 9 milljónir evra það sem af er degi í þremur viðskiptum. Með þessu er hann að bregðast við veikingu krónunnar það sem af er á árinu. Viðskiptin eru öllu meira en þau voru á gamlársdag, síðast þegar Seðlabankinn greip til svipaðra aðgerða. Styrking krónunnar vegna inngripsins nemur um 1,5%.

„Það sem við erum aðallega að velta fyrir okkur er að það liggur ekki alveg fyrir hver strategían er og hvað það er sem bankinn er að hugsa. hvort hann sé tilbúinn að styðja við gengi krónunnar með frekari inngripum á næstunni," segir Hafsteinn Gunnar Hauksson hjá Greiningu Arion banka. „Ef útflæðið verður áfram mikið og Seðlabankinn ætlar bara að vera á markaðnum til að styðja við gengið þá mun það bara koma mjög illa við gjaldeyrisforðann okkar," segir Hafsteinn.

Hafsteinn bendir aftur á móti á að Seðlabankinn ætti að hafa betri yfirsýn yfir þá aðila sem eru að kaupa upp í gjalddaga og ætti að vita hvað þeir eru komnir langt í sinni gjaldeyrissöfnun. „Þannig að ef hann telur sig vita að það er eitthvað að slakna á útflæðinu eða það að fara að minnka, þá er þetta jákvæð aðgerð," segir Hafsteinn.

Þá sé verið að senda jákvæð skilaboð inn á markaðinn, sérstaklega ef það er útlit fyrir að einhverjir sem eru að halda að sér höndum séu núna að fara með Seðlabankanum á markaðinn. „En hann þarf þá að vera viss um að það sé þetta sem sé að fara að gerast," segir Hafsteinn og bendir á að bankinn hafi skapað væntingar um að útflæði í aðdraganda síðustu áramóta hafi verið tímabundið, sem síðan hafi ekki staðist. Hann segir að það væri ágætt ef markaðurinn vissi betur hvað bankinn er að hugsa.

Vísir sendi fyrirspurn á Seðlabanka Íslands vegna viðskiptanna. Þar fengust þau svör að upplýsingar um viðskipti Seðlabankans á millibankamarkaði séu birtar með tveggja daga töf. Seðlabankinn hafi þá stefnu að eiga viðskipti á gjaldeyrismarkaði þegar þörf krefur í því skyni að draga úr gengissveiflum.