Wozniacki verður kylfusveinn McIlroy

Danska tennisstjarnan Caroline Wozniacki verður unnusta sínum, Rory McIlroy, innan handar í par 3 keppninni á morgun sem markar upphaf Masters-mótsins í golfi.

Wozniacki mun gegna hlutverki kylfusveins fyrir McIlroy en ekki er óalgengt að keppendur taki maka sína, vini eða börn með á mótið þar sem kylfingar spila níu holur með bros á vör.

Tiger Woods verður þó ekki meðal keppenda á par 3 mótinu frekar en undanfarin ár. Tiger, sem verður þó að sjálfsögðu á sínum stað þegar alvaran hefst á fimmtudaginn, hefur ekki spilað á upphitunarmótinu síðan árið 2003.

Hann hefur þó sagst munu mæta á mótið þegar börn hans eru orðin nógu gömul til þess að bera kylfurnar fyrir sig. Sam, dóttir Tiger, er 5 ára gömul þannig að golfáhugamenn þurfa að bíða eitthvað lengur eftir að Tiger mæti til leiks.

Það er hins vegar óskandi fyrir McIlroy að nærvera Wozniacki verði honum til happs. Norður-Írinn hefur átt erfitt uppdráttar á vellinum undanfarin misseri sem sumir rekja til umfjöllunar Independent á síðasta ári um að parið hefði slitið sambandi sínu. Sú reyndist raunin ekki vera og vonandi eru bjartari tímar framundan hjá McIlroy.

Par 3 keppnin á Masters-mótinu í golfi fer fram á morgun. Bein útsending á Stöð 2 Sport & HD hefst klukkan 19.