Ernst & Young á First North

Endurskoðunar- og ráðgjafarfyrirtækið Ernst & Young ehf. á Íslandi hefur fengið leyfi til að starfa sem viðurkenndur ráðgjafi á First North Iceland markaðstorginu sem rekið er af OMX kauphöllunum á Norðurlöndum.

„Með þessu er Ernst & Young orðið fullgildur ráðgjafi fyrirtækja við skráningu verðbréfa á hlutabréfa- og skuldabréfamarkað First North Iceland og á meðan viðskipti eru með verðbréf viðkomandi fyrirtækja á markaðnum,“ segir í tilkynningu Kauphallarinnar.

Haft er eftir Kristínu Rafnar, forstöðumanni skráningarsviðs NASDAQ OMX Iceland, að First North markaðurinn hafi alla burði til að vera blómlegur markaður sem styðji við fyrirtæki í vexti.

Þá er haft eftir Guðjóni Norðfjörð, sviðsstjóra viðskiptaráðgjafar hjá Ernst & Young, að fyrirtækið sé stolt af því að vera orðin viðurkenndur ráðgjafi á First North markaðnum.

„Við byggjum á breiðum og reynslumiklum hópi sérfræðinga við ráðgjöf og þjónustu til fyrirtækja og þetta er enn eitt skrefið hjá okkur að bæta og efla þjónustu við viðskiptavini okkar. Það verður spennandi að taka þátt í að efla First North markaðinn á Íslandi,“ er eftir honum haft.

Hlutverk viðurkennds ráðgjafa er einkum sagt felast í að vera félögum til halds og trausts þegar skráningarferli standi yfir og vera ráðgjafi og milliliður í samskiptum við markaðinn meðan verðbréf félags eru í viðskiptum.

„Það er á ábyrgð viðurkennds ráðgjafa að fylgjast með því að félög uppfylli ávallt þær aðgangskröfur og upplýsingaskyldur sem gilda á First North Iceland,“ segir í tilkynningu Kauphallarinnar.

Um fyrirtæki á First North gilda ekki jafnýtarlegar reglur og fyrirtæki á aðallista Kauphallarinnar og kunna því fjárfestingar í þeim flokki að vera áhættusamari en á aðallistanum.