Drómi gæti talist brotlegur

Fjármálaeftirlitið vinnur nú að sérstakri athugun sem snýr að viðskiptaháttum Dróma og hvort félagið brjóti lög með því að krefja lántakendur um mismun á láni sem áður hefur verið endurreiknað.

Drómi telur að lánið sem um ræðir sé löglegt lán í erlendri mynt og því hafi ekki átt að endurreikna það í samræmi við lög um gengistryggð lán. Drómi ákvað í kjölfarið að krefja lántakendur um að greiða mismuninn aftur sem nemur 1,5 milljörðum króna.

Frosti Sigurjónsson, alþingismaður og formaður efnahags- og viðskiptanefndar, segir á bloggsíðu sinni að svo virðist sem Drómi hafi með þessu sett viðskiptavini sína í verri stöðu en viðskiptavini annarra fjármálastofnana sem fengu gengistryggð lán sín endurreiknuð.

Efnahags- og viðskiptanefnd hefur því sent skriflega fyrirspurn til Fjármálaeftirlitsins um hvort hugsanlegt geti verið að Drómi sé með viðskiptaháttum sínum að brjóta lög, en eftirlitið á samkvæmt lögum að tryggja að framganga og viðskiptahættir fjármálastofnanna gagnvart viðskiptavinum sé í samræmi við það sem almennt tíðkast hjá fjármálafyrirtækjum.

Fram kemur í svari frá Fjármálaeftirlitinu að ekki sé hægt að leggja mat á málið fyrr en eftirlitið hafi aflað sér frekari upplýsinga. Ef kemur í ljós að Drómi hafi á einhvern hátt farið á svig við lög getur eftirlitið beitt sektum eða farið fram á úrbætur.