Ferðalangur hannar rafrænan vegvísi

Vefsíðan Vegvísir fór í loftið síðastliðinn mánudag, en tilgangur hennar er að auðvelda skipulagningu ferða um landið. Hugmyndina að síðunni átti Gunnar Þorvaldsson og hann vann síðuna í samvinnu við forritarann Pál Hilmarsson.

„Þetta er ekki alveg fullklárað en okkur fannst þetta nógu tilbúið til þess að fara í loftið núna.“ segir Gunnar, sem er grafískur hönnuður á auglýsingastofunni Jónsson og Le‘macks.

Hugmyndin að vefsíðunni er að skapa einfalda og aðgengilega síðu sem allir geta notað þegar kemur að því að skipuleggja ferðalög um landið.

„Ég hef verið að kenna sjálfum mér vefforritun í vetur og ákvað að gera þetta að fyrsta verkefninu mínu. Ég fékk Pál Hilmarsson vin minn, sem er forritari, til þess að sjá um gagnahliðina á verkefninu en ég sá um hitt.“ Hann segist hingað til hafa nýtt sér vefsíðu Vegagerðarinnar í ferðaundirbúningi fjölskyldu sinnar en rekið sig á að sú síða hafi ekki verið nógu þægileg í notkun. „Ég bjó þetta verkefni til fyrir sjálfan mig en komst fljótt að því að fólk var spennt fyrir þessu.“

Hann segir síðuna fyrst og fremst til gamans gerða, hún sýni á einfaldan hátt hversu langt sé á milli staða en komi ekki til með að aðstoða villta ferðamenn á hálendinu. Hann ítrekar að síðan sé enn í vinnslu og hvetur fólk til þess að koma með ábendingar á Facebook-síðu verkefnisins.

Auðvelt og aðgengilegt

Stimpli notandi inn brottfararstaðinn Hafnarfjörður og áfangastaðinn Ólafsvík kemur í ljós að leiðin er 200 km. Síðan má sjá að ferðin verður malbikuð meirihluta leiðarinnar, eða 196 km, en ferðalangar þurfa að aka 4 km á malarvegi. Að auki er ítarleg leiðarlýsing og vísað á nokkur kennileiti sem sjá má á leiðinni.

Til stendur að bæta við síðuna áætluðum bensínkostnaði og ferðatíma.

Andleysi engin afsökun

Sé ferðalangur í ferðahug en óviss með val á áfangastað þá er sleginn inn brottfararstaður, smellt á Af stað! og þá kemur upp áfangastaður valinn af handahófi.