Íslenskt forrit sem minnir þig á að vera í sambandi

Íslenska sprotafyrirtækið Transmit bjó nýlega til forritið Five Hundred Plus sem á að hjálpa fólki og fyrirtækjum að halda markvissu sambandi við viðskiptavini og tengslanet.

„Upprunalega hönnuðum við þetta forrit til að leysa vandamál sem við sjálfir vorum að glíma við í okkar daglega starfi,“ segir Agnar Sigmarsson, annar stofnenda Transmit, og bætir við að það skipti öllu máli hverja maður þekkir þegar kemur að því að reka starfsferil eða fyrirtæki.

„Nú á dögum er orðið mun auðveldara að byggja upp tengslanet með tilkomu forrita eins og LinkedIn og Facebook en Five Hundred Plus á að hjálpa notendum að viðhalda þessu tengslaneti.“ Five Hundred Plus er með notendur í yfir hundrað löndum en er þó enn þá í beta-prófun.

„Í næsta mánuði stefnum við á að rukka mánaðargjald fyrir áskrift að forritinu en öllum verður þó heimilt að notfæra sér kerfið án endurgjalds upp að vissu marki,“ segir Agnar.