Tekist á um skipan í sérfræðingahópinn

Stefnt er að því að tillaga um skipun sérfræðingahóps um almenna skuldaniðurfærslu verði lögð fram á ríkisstjórnarfundi á föstudag. Hópurinn á að skila tillögum sínum í nóvember, sem hefst eftir tæpar tólf vikur.

Í þingsályktun sem samþykkt var á sumarþingi hefur sérfræðingahópurinn það hlutverk að útfæra mismunandi leiðir til að ná fram höfuðstólslækkun verðtryggðra húsnæðislána og gera tillögur þar að lútandi. Hann mun starfa á ábyrgð forsætisráðherra og ráðherranefndar um úrlausnir í skuldamálum heimilanna en í henni sitja, auk forsætisráðherra, fjármálaráðherra, innanríkisráðherra og félags- og húsnæðisráðherra.

Samkvæmt heimildum Fréttablaðsins hefur ekki gengið þrautalaust að koma hópnum saman. Í þingsályktunartillögunni er ekki kveðið á um hversu margir eiga að skipa hópinn, hverjir tilnefni fulltrúana eða hvaða skilyrði sérfræðingarnir þurfa að uppfylla.

Farin var sú leið að hvor stjórnarflokkur um sig tilnefndi fulltrúa í hópinn en þó varð að vera samstaða þeirra á milli um skipun allra fulltrúana. Um þetta hafa staðið viðræður upp á síðkastið og ekki alltaf verið full eining.

Hópurinn mun hafa í ýmis horn að líta næstu mánuði, en mun þó byggja vinnu sína að miklu leyti á gögnum sem þegar hefur verið aflað í fyrri vinnu opinberra aðila við mat á skuldastöðu íslenskra heimila.

Báðir stjórnarflokkarnir voru með tillögur að aðgerðum í þágu skuldugra heimila á stefnuskrá sinni fyrir kosningar. Framsóknarflokkurinn boðaði að svigrúm sem mundi myndast með samningaviðræðum við kröfuhafa yrði notað í almenna niðurfærslu á skuldum. Sjálfstæðisflokkurinn sagðist vilja veita sérstakan skattaafslátt vegna afborgana af lánum til íbúðarkaupa.

Sérfræðingahópurinn mun meðal annars meta hvort velja eigi aðra af þessum tveimur leiðum, blöndu af þeim eða fara þær báðar og gefa fólki kost á að velja á milli þeirra. Verði almenn niðurfærsla fyrir valinu þarf hópurinn einnig að taka afstöðu til þess hversu almenn hún á að vera, meðal annars hvort taka skuli tillit til skuldaaðgerða á vegum stjórnvalda sem fólk hefur þegar notið.

Hann á jafnframt að taka út kosti og galla þess að stofna sérstakan leiðréttingarsjóð sem ætti að brúa bilið þangað til niðurstaða fæst um endanlegt uppgjör við kröfuhafa föllnu bankanna.