MCS segir makrílveiðar Íslendinga nær ósjálfbærar, hörð mótmæli frá LÍÚ

Landsamband íslenskra útvegsmann hefur mótmælt harðlega þeirri ákvörðun bresku umhverfissamtakanna Marine Conservation Society  (MCS) að dæma makrílveiðar Íslendinga nær ósjálfbærar.

Þessi ákvörðun gæti reynst íslenskum fiskseljendum í Bretlandi dýrkeypt því margar stórverslanakeðjur þar í landi selja ekki fisk eða fiskafurðir frá löndum eða útgerðum sem Marine Consveration Society segir að stundi ósjálfbærar veiðar.

LÍÚ kemur skoðunum sínum á framfæri á vefsíðunni Fishupdate. Þar kemur fram að samkvæmt hafréttindasáttmála Sameinuðu Þjóðanna hafi Ísland, Færeyjar, Noregur og Evrópusambandið rétt til að stunda makrílveiðar innan eigin lögsögu. Minnt er á að makrílstofninn hafi verulega breytt hegðun sinni á undanförnum árum og stór hluti hans er nú á beit á íslenskum miðum að sumarlagi.

Fram kemur að Íslendingar hafi dregið úr kvóta sínum um15% í ár í samræmi við ráðgjöf vísindamanna. LÍÚ segir að ekkert réttlæti það að segja að íslenskar makrílveiðar séu ósjálfbærar þegar haft er í huga að Evrópusambandið og Norðmenn úthluti sér einhliða um 90% af öllum kvótanum.

MCS eru góðgerðarsamtök sem einbeita sér að umhverfisvernd hafsins, en þó einkum ofveiði á nytjastofnum þess. Þau eru mjög áhrifamikil og fer breska þingið þannig yfirleitt eftir ráðleggingum þeirra þegar kemur að löggjöf sem snertir baráttumál samtakanna.