Hraðinn kom Sutil á óvart

Sjö ökumenn skiptust á að leiða kappaksturinn í Ástralíu um helgina. Kimi Räikkönen stóð á endanum uppi sem sigurvegari en óvæntast var hversu fljótur Adrian Sutil var í Force India-bíl sínum um stræti Melbourne.

Sutil snýr aftur í Formúlu 1 í ár eftir árs hlé vegna dóms og sem hann hlaut í Þýskalandi fyrir að berja mann með kampavínsglasi í Kína. Hann ók áður fyrir Force India árið 2011.

Þjóðverjinn sagðist sjálfur vera hissa á því að hafa náð forystunni í mótinu og geta svo haldið henni þar til hann fór inn á viðgerðarsvæðið. „Ég var ekki að búast við þessu þegar ég skrifaði undir samninginn í vetur. Ég kom samt með það í huga að gera betur en síðast og það var frábær tilfinning að komast beint í forystu," sagði Sutil sem á endanum lauk mótinu sjöundi eftir að hafa tekið ranga ákvörðun í dekkjavali undir lokin.

Sutil náði að halda forystunni og byggja upp forskot á heimsmeistarann Sebastian Vettel um miðbik keppninnar en þurfti að láta fyrsta sætið af hendi þegar dekkin fóru að slitna ískyggilega. Sutil hóf keppnina á harðari dekkjagerðinni og gat því ekið mun lengur inn í mótið fyrir fyrsta hlé en aðrir ökumenn. Það reyndist dýrmætt.

„Ég náði svo forystunni aftur eftir viðgerðahléið svo hraðinn var í alvöru til staðar. Vettel var örugglega of nálægt mér og eyðilagði kannski dekkin sín fyrir aftan mig. Ég vissi að ég væri að fara að missa sætin niður því ég var á annarri keppnisáætlun. En sjöunda sæti í fyrsta mótinu og að leiða stóran hluta mótsins sýnir hvað er mögulegt."