Lykilvitni segir Magnús og Hreiðar hafa samið Al Thani fléttuna

Halldór Bjarkar Lúðvígsson, sem var viðskiptastjóri á lánasviði Kaupþings, bar vitni í Al Thani málinu, en aðalmeðferð þess heldur áfram í dag. Halldór hefur verið nefndur lykilvitni saksóknara í málinu. Saksóknari spurði Halldór spurninga, en verjendur hafa nú tekið við.

„Það voru Maggi og Hreiðar sem voru að semja þetta allt saman,“ sagði Halldór við vitnaleiðsluna í morgun og á þá við Magnús Guðmundsson og Hreiðar Má Sigurðsson, sakborninga í málinu og fléttuna í kringum viðskiptin milli Kaupþings og Al Thani.

Al Thani fékk um 13 milljarða króna lán frá Kaupþingi inn í félagið Serval. Fjárhæðin var síðan lánuð áfram í félag að nafni Choice og loks áfram í félagið Q-Finance.

Al Thani átti að fá 50 milljón dollara fyrir að ljá nafn sitt við viðskiptin en það var engin ábyrgð sem lá að baki þessum lánveitingum.

Aðspurður hvort viðskiptin hafi verið framkvæmd með þeim hætti sem gert var til að fela það að Ólafur Ólafsson, einn sakborninganna ætti helminginn í þessum peningum sagði Halldór: „Það eru mínar bollaleggingar um að þetta hafi verið gert til að fela þá slóð.“

Viðskiptin hafi verið framkvæmd í miklum flýti en Hreiðar og Magnús hafi lagt mikla áherslu á það. Þá sagði Halldór að það hefði verið óvanalegt að greiða út lán og fá samþykki fyrir því eftir á en vanalega hafi verið fyrst fengin heimild fyrir lánum í lánanefnd áður en þau hafi verið greidd út.

Í tölvupósti sem lagður var fram milli Magnúsar og Halldórs kemur fram að Magnús hafi fyrirskipað að halda ætti skuldum í íslenskum krónum meðan krónan væri að lækka og skipta svo.

Aðspurður hvort Ólafur hafi átt að hagnast á þessum viðskiptum sagði Halldór það hafa verið sinn skilning. Hann hafi ekki vitað hver aðkoma Sigurðar Einarssonar hafi verið að málinu, þó það hafi verið hans upplifun að Sigurður væri inn í þeimn málum sem væru að gerast.