Ég hef stefnt að þessu síðan ég var sautján ára

„Ég hef stefnt að þessu síðan ég var sautján ára,“ segir Valdís Þóra Jónsdóttir, kylfingur úr Leyni. Valdís Þóra, sem verður 24 ára þann 4. desember, hefur leik á úrtökumótinu fyrir Evrópumótaröðina degi síðar. Leikið verður í Marokkó þar sem þrjátíu efstu sætin gefa þátttökurétt á mótaröðinni á næsta ári.

Valdís hefur verið við háskólanám í Texas í Bandaríkjunum undanfarin fjögur ár. Hún lagði áherslu á innanhússhönnun og lauk náminu í sumar. Hún segist hafa velt fyrir sér að reyna við mótaröðina vestanhafs sem fram fór í vikunni.

„Þar sem ég var að breyta sveiflunni minni í maí ákvað ég að bíða og reyna frekar við Evrópumótaröðina.“

Valdís var nýkomin úr líkamsrækt þegar blaðamaður heyrði í henni hljóðið í gærmorgun. Hún æfir af krafti hér heima út september en heldur svo til Orlando í Bandaríkjunum í byrjun október. Þar mun hún æfa við bestu aðstæður í tvo mánuði.

„Það er erfitt að æfa hérna heima þegar veðrið er ekki að vinna með manni,“ segir Valdís Þóra sem mun búa í húsi með Alexander Aroni Gylfasyni og Þórði Rafni Gissurarsyni ytra.

„Það verður gott að fá samkeppni frá þeim,“ segir Valdís sem ætlar að vera komin til Marokkó ekki seinna en 1. desember. Þá fær hún fjóra daga til æfinga fyrir stóru stundina.

„Ég ætla að nýta tímann vel til að jafna mig á tímamismuninum og kynnast grasinu.“

Valdís segir mikinn kostnað fylgja æfingaferðinni til Bandaríkjanna og ferðalaginu til Marokkó. Hún stendur því fyrir styrktarmóti í samstarfi við Leyni á Garðsvelli á Akranesi sunnudaginn 8. september.