Fjárfestingar í sjávarútvegi aftur á skrið

Sérfræðingar Íslandsbanka og Landsbankans telja að fjárfestingar í sjávarútvegi séu aftur að komast á skrið. Undanfarin ár hafi fjárfestingar innan atvinnugreinarinnar verið í lágmarki þrátt fyrir góða afkomu. Þetta kemur fram í frétt á vef Landssambands íslenskra útvegsmanna.

Þar er tekið fram að nokkrar ástæður séu fyrir því hve lítið hefur verið fjárfest. Helst beri að nefna óvissu um fiskveiðistjórnunarkerfið auk þess sem fyrirtæki hafa lagt á það mikla áherslu eftir hrun að greiða niður skuldir.

„Rúnar Jónsson, forstöðumaður sjávarútvegs hjá Íslandsbanka, segir að svo virðist sem að nú hafi myndast geta og vilji hjá fyrirtækjum til endurnýjunar. Staða og fjárhagslegt bolmagn sjárvarútvegsfyrirtækja sé misjöfn. Þannig séu fjárfestingar í uppsjávarfyrirtækjum mestar.“

Þá hafi uppsjávarfyrirtæki byggt vinnslur til að auka gæði aflans og þar með verðmæti. Nýjar vinnslur hafi verið byggðar víða og einnig hafi orðið mikil endurnýjun á tækjabúnaði í bolfiskvinnslu. „Með þessu myndast öflugri og betri sjávarútvegur, því þetta snýst ekki einungis um að viðhalda framleiðslutækjum heldur líka um að auka gæði og þar með tekjumöguleika útvegsins. Auk þess sem framleiðslan verður umhverfisvænni með nýrri tækni og aðferðum,“ er haft eftir Rúnari.

Undir þetta tekur Magnús H. Karlsson, viðskiptastjóri hjá Landsbankanum. „Með fjárfestingum eru gæði afurða aukin og hægt verður að vinna verðmætari vöru á hagkvæmari og umhverfisvænni hátt.“

Þá eru sérfræðingar bankanna sammála um mikilvægi þess að fyrirtæki hafi tækifæri til að fjárfesta í nýsköpun og aukinni fullvinnslu. „Hugvit, markaðsetning og aukin vinnsla hafa aukið verðmæti sjávarafurða undanfarin ár. Greining Sjávarklasans hafa til dæmis sýnt fram á að þótt nú sé afli íslenska flotans helmingi minni en hann var fyrir um þrjátíu árum eru verðmæti hans þreföld,“ segir á vef LÍÚ.

„Meðal nýrra fjárfestinga í greininni, utan vinnslna, má nefna að HBGrandi hefur samið um smíði tveggja skipa til veiða á uppsjávarfiski. Samningsverð er um 7,2 milljarðar króna. Sömuleiðis hefur Ísfélagið keypt nýtt skip til uppsjávarveiða sem á að verða tilbúið til veiða nú eftir áramót.“